Yol polisi yeni tədris ilinin başlanması ilə əlaqədar sürücülərə səsləndi

Bakı Şəhər Dövlət Yol Polisi İdarəsi yeni tədris ilinin başlanması ilə əlaqədar yol hərəkəti iştirakçılarına müraciət edib.

Xüsusilə təhsil müəssisələrinin yerləşdiyi ərazilərdə sürücülərdən anlayışlı olmaları, digər hərəkət iştirakçılarının rahat və fasiləsiz hərəkətinə maneə yaratmamaları tövsiyə olunur.

“Paytaxtda yeni tədris ilinin başlanması ilə əlaqədar küçə və prospektlərdə, xüsusilə də təhsil müəssisələrinin yerləşdiyi ərazilərdə nəqliyyat vasitələrinin və piyadaların hərəkət intensivliyi artacaq.

Bunları nəzərə alaraq, bütün sürücülərdən xahiş edirik ki, yol hərəkəti qaydalarına ciddi riayət etsinlər, əsasən də fərdi nəqliyyat vasitələri ilə şagirdləri məktəbə aparan sürücülər dayanma-durma qaydalarını pozmamaqla avtomobillərini icazə verilən ərazilərdə saxlasınlar ki, digər hərəkət iştirakçılarının rahat və fasiləsiz hərəkətinə maneə yaratmasınlar.

Eyni zamanda piyadalara səki ilə hərəkət etməklə avtomobil yollarına çıxmamağı və hərəkət hissəsini piyada keçidləri ilə keçməyi, valideynlərə isə azyaşlı uşaqları nəzarətsiz qoymamağı tövsiyə edirik”, – müraciətdə deyilir.

Qeyd edək ki, yeni tədris ilinin başlanması ilə əlaqədar Nəqliyyatı İntellektual İdarəetmə Mərkəzi tərəfindən paytaxtda yerləşən təhsil müəssisələrinin ətrafı, əraziyə yaxın küçə və prospektlər müşahidə kameraları vasitəsilə nəzarətdə saxlanılacaq.