Zakir Həsənov orduya göstəriş verdi

Müdafiə naziri general-polkovnik Zakir Həsənovun rəhbərliyi ilə 2023-cü ilin birinci yarım ilinin yekunlarına dair Müdafiə Nazirliyinin kollegiya iclası keçirilib. Toplantıda Azərbaycan-Ermənistan şərti sərhədi və Qarabağda mövcud əməliyyat şəraiti təhlil edilib.

Zakir Həsənov Ermənistan Silahlı Qüvvələri və qeyri-qanuni erməni silahlı dəstələrinin mövqelərimizi intensiv atəşə tutmasının, habelə Qarabağ ərazisində qeyri-qanuni hərbi daşımaların və uzunmüddətli fortifikasiya qurğularının quraşdırılması cəhdlərinin qarşısının alınması məqsədilə bölmələrimizin bundan sonra da zəruri cavab tədbirləri görməsi barədə göstərişlər verib.

Eyni zamanda orduya qarşı tərəfin fəaliyyətinin daim müşahidə edilməsi və istənilən təxribatın qarşısının qətiyyətlə alınmasına hər an hazır olması tapşırılıb.

Müdafiə naziri Ali Baş Komandanın 2023-cü ilin növbəti yarımili üçün Azərbaycan Ordusu qarşısında qoyduğu tapşırıqları kollegiya iştirakçılarına çatdırıb, şəxsi heyətin sağlamlığı və təhlükəsizliyinin qorunması, peşəkarlıq və döyüş hazırlığının daha da artırılması, habelə qoşunların döyüş qabiliyyətinin yüksək səviyyədə saxlanılmasına xüsusi diqqət yetirilməsini tapşırıb.