Zaxarovanı özündən çıxardılar | Ermənistana od püskürdü

“Qarabağdakı erməni sakinlərə qarşı heç bir etnik təmizləmə aparılmayıb”.

Bunu Rusiyanın Xarici İşlər Nazirliyinin sözçüsü Mariya Zaxarova yanvarın 12-də keçirdiyi brifinqdə deyib.

O bildirib ki, əgər rəsmi İrəvanın iddia etdiyi məsələ ilə bağlı sübutu varsa, təqdim etsin.

M.Zaxarova Ermənistan tərəfinin Qarabağdakı Rusiya sülhməramlı kontingentinin öhdəliyini yerinə yetirməməsi ilə bağlı səsləndirdiyi ittihamlara da cavab verib. Bildirib ki, rəsmi İrəvanın onlara qarşı səsləndirdiyi fikirlər əsassızdır:

“Biz Qarabağdakı Rusiya sülhməramlıları əleyhinə Ermənistan hakimiyyət nümayəndələrinin bəyanatlarını görürük və onları destruktiv hesab edirik. Qəribədir ki, bu bəyanatlar davam edir. Biz dəfələrlə bu bəyanatlarla bağlı Rusiya tərəfinin mövqeyini Ermənistan tərəfinin diqqətinə çatdırmışıq. Bildirmişik ki, bu cür bəyanatlar ikitərəfli münasibətlərdə yeni problemlər yaradır və dəqiq heç nəyin həllinə kömək etmir.

Lakin təəssüflər olsun ki, görünür, bu, orada sanki kiməsə sərf edir. Mən sadəcə olaraq konkret sübutlar gətirirəm. Əgər kimsə vicdanını itirib nəyinsə icra olunmadığını deyirsə, o zaman fakt təqdim etsin. Faktları, arqumentləri masa üstünə qoysun. Faktlar yoxdur. İsterika və təhqirdən başqa heç nə yoxdur. Heç kəsin sülhməramlıları təhqir etməyə haqqı çatmır. Kimlərsə onları təhqir etsə, biz cavab verəcəyik”.

Xarici İşlər Nazirliyinin sözçüsü sonda Ermənistanın paytaxtında yanvarın 1-də neonasistlərin yürüş keçirməsi məsələsinə də toxunub. O bildirib ki, Kreml sözügedən hadisədən dərin narahatlıq keçirib.