Zəlzələdən sonra üzə çıxan divarların sirri

Səngəçalda Otman-Bozdağ vulkanı çevrəsində qəribə mənzərə müşahidə edilib.

Sosial şəbəkələrdə yayılan və iddia edilən görüntülərə görə, Otman-Bozdağ vulkanına yaxın ərazidə qala divarları üzə çıxıb.

Məsələ ilə bağlı aidiyyəti qurumun əməkdaşları adıçəkilən ünvana baş çəkiblər. Ancaq məsələnin tamamilə fərqli olduğu üzə çıxıb.

Mədəni İrsin Qorunması, İnkişafı və Bərpası üzrə Dövlət Xidmətindən bildirilib ki, aşınma nəticəsində üzə çıxan daşlar tikinti effekti yaradıb.

Qeyd edilib ki, ərazidə tarixi, arxeoloji əlamət daşıyan hər hansı mədəniyyət nümunəsi aşkar edilməyib. Qala divarlarının olduğu iddia edilən yerin təbii aşınma nəticəsində yaranmış daş qatları olduğu müəyyən edilib.