Səngəçal karvansarasına qanunsuz müdaxilə edənlər məsuliyyətə cəlb olunacaq | Mədəniyyət Nazirliyi

Qaradağ rayonunda yerləşən XV əsrə aid qədim Səngəçal karvansarası bir zamanlar tacirlərin və səyyahların dayanacaq məntəqəsi olub. Son illərə qədər isə ictimai iaşə obyekti kimi fəaliyyət göstərib.

Məlumata görə, bir sıra şəxslər tərəfindən karvansaranın üzərindəki qədim yazıların və tamğaların üzəri qum və sement məhlulu ilə örtülərək abidəyə ciddi ziyan vurulub.

Mədəniyyət Nazirliyinin nümayəndəsi Fariz Hüseynli Baku TV-yə açıqlamasında bildirib ki, hadisə barədə məlumat daxil olan kimi Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin Bakı Regional İdarəsinin əməkdaşları tərəfindən əraziyə baxış keçirilib.

“Araşdırma zamanı müəyyən olunub ki, abidənin üzərindəki tarixi yazı və tamğaların səthi qum və sement məhlulu ilə örtülərək zədələnib. Dövlət Xidməti tərəfindən həyata keçirilən operativ tədbirlər nəticəsində müdaxilənin izləri aradan qaldırılıb, tarixi elementlərin üzərini örtən materiallar təmizlənərək abidənin ilkin vəziyyətinin bərpası təmin edilib. Faktla bağlı İnzibati Xətalar Məcəlləsinin 231.3-cü maddəsinə əsasən hadisəni törətmiş şəxslərin məsuliyyətə cəlb olunması istiqamətində müvafiq tədbirlər görülür”.