Zibil yığan ananın pulunu narkotikə verən uşaqlar - ARZUNUN VAXTI

Baku TV-nin “Arzunun vaxtı” verilişinin yeni buraxılışı efirə gedib.

Verilişin budəfəki sayında narkotik aludəçiliyindən əziyyət çəkən bacı-qardaş Esmira və Tayfun öz həyat hekayələrini danışıblar.

23 yaşlı Esmira əvvəllər kikboksinqlə məşğul olub və çempionluqları var. O, məşq yoldaşı vasitəsilə pis vərdişin qurbanı olduğunu söyləyib:

“Dərman verib deyirdi ki, yarışa çıxanda atarıq, enerji verəcək. Ondan sonra öyrəşdim. Sonra yenə alması üçün pul verməyə başladım. İndi artıq iynəyə keçmişəm. O yerə çatmışam ki, özümü öldürüm”.

25 yaşlı Tayfun isə 7 ildir narkotik istifadəçisi olduğunu söyləyərək qeyd edib ki, həyat yoldaşından da pis vərdişinə görə ayrılıb.

Baku TV-nin müraciətindən sonra “Həyat naminə” Reabilitasiya Mərkəzi Tayfunun müalicəsini öhdəliyinə götürüb. Lakin bütün cəhdlərə baxmayaraq, o, müalicəyə tabe olmaq istəməyib və iki gün sonra mərkəzi öz istəyi ilə tərk edib. Esmira isə Kikboksinq Federasiyasının prezidenti, millət vəkili Adil Əliyevin dəstəyi ilə “Həyat üçün Şans” Reabilitasiya Mərkəzinə yerləşdirilib.