2 mart tarixində nə baş verəcək? | Böyük Britaniyanın Baş nazirindən açıqlama

Böyük Britaniyanın Baş naziri Kir Starmer Donald Tramp və Volodimir Zelenski arasında baş verən mübahisədən sonra Ukraynaya dəstəyini ifadə edib.

Bu barədə Böyük Britaniya Baş nazirinin mətbuat xidməti məlumat yayıb.

K.Starmer D.Tramp və V.Zelenskinin görüşündən sonra hər iki liderlə telefon danışığı aparıb.

Məlumatda bildirilir ki, K.Starmer Ukraynaya sarsılmaz dəstəyini davam etdirir. O, Ukraynanın suverenliyi və təhlükəsizliyi əsasında davamlı sülhün yolunu tapmaq üçün əlindən gələni edir. Bundan əlavə, Baş nazir 2 mart tarixini və beynəlxalq liderlərlə, o cümlədən V.Zelenski ilə görüşü səbirsizliklə gözlədiyini bildirib.

Xatırladaq ki, fevralın 28-də Ağ Evdə V.Zelenski və D.Trampın görüşü baş tutub. Ukrayna Prezidenti Vaşinqtona nadir metallar üzrə saziş imzalamaq üçün getsə də, danışıqlar jurnalistlərin gözü önündə mübahisə ilə nəticələnib. Bununla da Volodimir Zelenski heç bir saziş imzalamadan və mətbuat konfransı keçirmədən Ağ Evi vaxtından əvvəl tərk edib.