2 ölkə müharibə ilə bağlı planlarını açıqladı | Ukraynada nələr baş verəcək?

Fransa Prezidenti Emmanuel Makron və Böyük Britaniyanın Baş naziri Kir Starmer Ukraynada atəşkəsi təmin etmək üçün hərbi qüvvə yaratmaq planlarını açıqlayıblar.

Onların NATO-nun Nortvuddakı komandanlıq mərkəzində keçirdiyi mətbuat konfransı Fransa mətbuatı tərəfindən yayımlanıb.

Makronun sözlərinə görə, Ukraynada atəşkəsi təmin etmək və beynəlxalq qüvvələrin əsasına çevrilmək üçün nəzərdə tutulmuş Fransa-Britaniya birgə ekspedisiya kontingentinin sayı 50 min hərbçiyə çata bilər.

“Biz bu birləşmiş qüvvələrin sayını briqada səviyyəsindən ordu korpusu səviyyəsinə qədər artırırıq, yəni genişmiqyaslı əməliyyata cəlb oluna bilən hərbçilərin sayı 50 minə qədər ola bilər”, ‒ deyə Fransa lideri bildirib.

Onun sözlərinə görə, bu qüvvələr həm də “digər Avropa tərəfdaşlarını birləşdirə” və NATO-nun istifadəsinə verilə biləcək.

Starmer isə bildirib ki, koalisiyanın Parisdə qərargahı artıq fəaliyyətdədir və Kiyevlə məsləhətləşmələr əsasında idarəetmə strukturlarını yekunlaşdırır. Bir il sonra qərargah Londona köçürüləcək.

Qeyd edək ki, iki lider bu barədə ABŞ-nin Ukrayna üzrə xüsusi nümayəndəsi Kit Kelloqun da daxil olduğu “arzu edən ölkələrin koalisiyası”nın videokonfransına birgə ev sahibliyi etdikdən sonra açıqlama verib.