23 illik həbsdən sonra Qəzzaya qayıdan fələstinli nələr danışdı?

İsraildə 23 il həbsdə saxlanılan və xərçəng müalicəsi aldığı bildirilən fələstinli İmad əs-Sərrac girovların mübadiləsi çərçivəsində Qəzzaya qaytarılıb.

Məlum olub ki, İmad əs-Sərrac xərçəngdən əziyyət çəkmirmiş. Bu səbəbdən onun üzərində xərçəng müalicəsi adı ilə hansı sınaqların aparıldığı araşdırılır.

İmad əs-Sərracın sözlərinə görə, İsrail bu yolla fələstinlilərdə ruh düşkünlüyü yaratmağa çalışıb.

Onun xərçəng müalicəsi 2017-ci ildə başlayıb. Belə ki, aclıq aksiyası edən İmad əs-Sərracın mədə-bağırsaq problemləri yaranıb və israilli həkimlər buna xərçəng diaqnozu qoyublar. Sadəcə, mədə-bağırsaq probleminə prostat xərçəngi müalicəsinin yazılması müəyyən şübhələrin yaranmasına səbəb olub.

2023-cü ilin 7 oktyabrında Qəzzaya hücumlar başlayanda İsrail tərəfi fələstinlinin müalicəsini dayandırıblar.

Noyabrın 13-də Qəzzaya qaytarılan İmad əs-Sərrac Xan Yunisdəki xəstəxanada müayinədən keçib və onda xərçəng xəstəliyi tapılmayıb.

Türkiyə mətbuatının məlumatına görə, İsrailin təcridxanalarında 10 mindən çox fələstinli saxlanılır. Onların arasında qadın, uşaq, yaşlı və xəstə insanlar da var.

İmad əs-Sərracın sözlərinə görə, fələstinliləri fiziki zorakılıq, aclığa məruz qoyaraq, yalançı xəstəliklərlə qorxuya salaraq öldürməyə çalışırlar.