27 yaşlı futbolçuya atəş açıldı | Türkiyədə dəhşətli hadisə

Türkiyənin Kocaeli şəhərində baş verən silahlı insident zamanı üç nəfər xəsarət alıb.

Bu barədə yerli mətbuat xəbər verib.

Məlumata görə, iki qrup arasında yaranan mübahisə silahlı insidentə çevrilib. Nəticədə "Sultanbeyli Belediye Spor" futbol komandasının oyunçusu Uğurcan Bekçi və daha iki nəfər güllə yarası alıblar.

Hadisə yerinə təcili tibbi yardım və polis əməkdaşları cəlb olunub. Yaralılar təcili yardım maşınıyla xəstəxanaya aparılıblar. Uğurcan Bekçinin ayağından yaralandığı və əməliyyat olunduğu bildirilir.

Qeyd edək ki, 27 yaşlı futbolçu daha əvvəl bir neçə komandada çıxış edib. Polis hadisəni törətməkdə şübhəli bilinən şəxslərin axtarışına başlayıb. Münaqişəyə nəyin səbəb olduğu məlum deyil. Zərərçəkənlərin hansı markalı odlu silahdan açılan atəşlə xəsarət aldıqları açıqlanmır.