28 maddəlik sülh planı Zelenskini çıxılmaz vəziyyətə salıb | "Əsl sülh ədalətə əsaslanır"

ABŞ Prezidenti Donald Tramp Ukraynadakı müharibəyə son qoymaq üçün əsasən Moskvanın xeyrinə olan 28 maddəlik yeni bir plan təqdim edib.

Tramp deyir ki, Zelenskinin müharibəni davam etdirmək üçün heç bir kartı yoxdur və ərazi güzəştləri, ordunun sayının əhəmiyyətli dərəcədə azaldılması və NATO-ya qoşulmamaq vədini əhatə edən şərtlərlə razılaşmalıdır.

“Yaxın günlərdə biz tərəfdaşlarla müharibəni bitirmək üçün atılacaq addımlar barədə məsləhətləşəcəyik. Mən Ukrayna nümayəndə heyətinin tərkibi haqqında fərman imzalamışam. Bütün müvafiq direktivlər təsdiq edilib. Nümayəndələrimiz Ukraynanın milli maraqlarını necə qoruyacağını yaxşı bilirlər.

Əsl sülh həmişə təminatlı təhlükəsizliyə və ədalətə əsaslanır”, ‒ deyə Ukrayna Prezidenti bildirib.

Planın mərkəzində ərazinin bir hissəsi Ukraynanın nəzarəti altında qalsa belə, şərqi Donbas bölgəsinin təhvil verilməsi tələbi dayanır. Analitiklər Rusiya qüvvələrinin bölgəni tam ələ keçirməsinin illər çəkəcəyini təxmin edirlər, lakin Tramp onun itirilməsinin “an məsələsi” olduğunu iddia edir.

“28 bəndlik plan ədalətli və davamlı sülh üçün vacib olan bir sıra mühüm elementlərə malikdir və hamımızın istədiyi budur. Lakin planda bəzi müddəlara dəyişikliklərin edilməsi lazımdır. Onu da deyim ki, Ukrayna ilə bağlı bütün məsələləri sonda Ukrayna özü həll etməlidir və buna görə də biz ukraynalılarla müntəzəm olaraq danışırıq”, ‒ deyə Böyük Britaniyanın Baş naziri Kir Starmer bildirib.

Ağ Evin mətbuat katibi Kerolayn Livitt iddia edir ki, plan vəziyyətin reallıqlarını əks etdirir və ən yaxşı ssenari təklif edir. Lakin tənqidçilər xəbərdarlıq edirlər ki, onun qəbul edilməsi Kiyevin mövqeyini ciddi şəkildə sarsıda və Moskvanın təsirini gücləndirə bilər.

Qeyd edək ki, Donald Trampın 28 bəndlik sülh planı şəxsən Zelenskiyə ABŞ Ordusunun katibi Den Driskol tərəfindən təqdim edilib. ABŞ rəsmisinin sözlərinə görə, Ukrayna tərəfi planı gələcək danışıqlar üçün başlanğıc nöqtəsi kimi qəbul edib.