Abbas Əraqçi və Hakan Fidan regiondakı son hadisələri müzakirə ediblər - Baku TV

Türkiyənin xarici işlər naziri Hakan Fidan yanvarın 14-də iranlı həmkarı Abbas Əraqçi ilə növbəti telefon danışığı aparıb.

Bu barədə İran Xarici İşlər Nazirliyinin mətbuat xidməti məlumat yayıb.

Nazirlər bölgədə yaranmış vəziyyəti müzakirə ediblər. Bildirilib ki, İranın XİN rəhbəri türkiyəli həmkarına ölkəsində son günlərdə baş verən hadisələr və xalqın dinc etirazlarının zorakılığa keçməsi barədə danışıb.

A.Əraqçi vurğulayıb ki, zorakılığın katalizatoru başqa dövlətlərlə əlaqəli elementlər olub, bu da bir neçə İran vətəndaşının ölümü ilə nəticələnib. O, H.Fidanla söhbətində ölkədəki vəziyyətə xarici müdaxiləni və iğtişaşların səbəblərini açıqlayıb.

Qeyd edək ki, İranda rialın qiymətinin kəskin ucuzlaşması ölkədə vəziyyəti daha da pisləşdirib. Bunun nəticəsində vətəndaşlar bir neçə gün müddətində hökumətə etiraz olaraq aksiyalar keçiriblər. Bununla belə aksiyalarda təhlükəsizlik qüvvələri və etirazçılar da daxil olmaqla ölənlərin sayının 2550-dən çox olduğu, 1134-dən çox insanın yaralandığı bildirilir.