ABŞ bölgəyə 15-dən çox hərbi gəmi cəlb edib

Yaxın Şərqdə hərbi gərginlik özünün ən yüksək pik nöqtəsinə çatıb və ABŞ rəsmi olaraq İrana qarşı dəniz blokadasının icrasına başlayıb. Baku TV-nin "Dünya" xidmətinin verdiyi məlumata görə, ABŞ Mərkəzi Komandanlığı (CENTCOM) Hörmüz boğazı və İranın digər strateji limanlarını tam nəzarətə götürmək üçün bölgəyə 15-dən çox hərbi gəmi cəlb edib; 17 aprel 2026-cı il tarixinə olan son hərbi məlumatlara əsasən, bu nəhəng donanmaya aviadaşıyıcılar, idarəolunan raket silahlarına malik esmineslər, desant gəmiləri və sualtı qayıqlar daxildir. "The Wall Street Journal"ın (WSJ) məlumatına görə, ABŞ-ın bu hərbi qüvvəsi İrana gedən və oradan çıxan bütün gəmilərin hərəkətini bloklamaq, zərurət yarandıqda isə hərbi güc tətbiq etmək əmri alıb. Donald Tramp administrasiyasının regional hərbi eskalasiya siyasəti və "Epic Fury" əməliyyatının bir hissəsi olan bu blokada, İraqın 2003-cü il işğalından bəri ABŞ-ın bölgədəki ən böyük hərbi yığıncağı hesab olunur. Donald Trampın regional xaos siyasəti nəticəsində yaranan gərginlik fonunda, 15-dən çox hərbi gəminin Hörmüzdə cəmləşməsi qlobal enerji marşrutlarını tamamilə ABŞ-ın hərbi iradəsindən asılı hala salıb.

Məlumata əsasən, reportajda USS "Abraham Lincoln" və USS "Gerald R. Ford" aviadaşıyıcı qruplarının bölgədəki mövqeləri, həmçinin blokada əməliyyatlarına dəstək verən "USS Tripoli" amfibiya hücum gəmisinin imkanları yer alıb. Videoda Donald Trampın regional hərbi eskalasiya siyasəti fonunda bu qüvvələrin İranın sahil müdafiə sistemlərinə qarşı effektivliyi ekspertlər tərəfindən şərh olunub.