ABŞ bununla razılaşsa... | İranın təklifi dünyaya səs salacaq

Tehran Amerika sərmayəsinin cəlb olunması şərti ilə uranın zənginləşdirilməsi üçün Yaxın Şərq ölkələrindən ibarət konsorsium yaratmağı təklif edib.

Bu barədə "The New York Times" yazıb.

Nəşrin məlumatına görə, bazar günü Omanda İranın xarici işlər naziri Abbas Əraqçi bu planı ABŞ Prezidentinin xüsusi elçisi Stiven Uitkoffa təqdim edib.

Qeyd edildiyi kimi, İslam Respublikası bu təşəbbüsə Vaşinqtonun nüvə proqramından tamamilə imtina tələbinə alternativ kimi baxır. Nəşr konsorsiumun mümkün iştirakçıları kimi Səudiyyə Ərəbistanı və Birləşmiş Ərəb Əmirliklərinin adını çəkir.

İranın təklifinə üçtərəfli nüvə konsorsiumunun yaradılması, Tehranın uranı 3,67%-ə qədər zənginləşdirməsi və mülki məqsədlər üçün digər ərəb ölkələrinə tədarük etmək planları daxildir.

Bundan başqa, İranın nüvə obyektlərində digər ölkələrdən müşahidəçilərin, o cümlədən ABŞ-dən olan ekspertlərin iştirakı nəzərdə tutulur. 2015-ci il müqaviləsindən fərqli olaraq, bu razılaşma 15 illik müddətlə məhdudlaşmayacaq, yəni müddətsiz xarakter daşıya bilər.

Omanın vasitəçiliyi ilə Tehranın nüvə proqramı ətrafında yaranmış vəziyyəti həll etmək üçün İran və ABŞ danışıqların dördüncü raundunu keçirib. Birinci tur aprelin 12-də Maskatda, ikinci tur aprelin 19-da Romada, üçüncü və dördüncü tur aprelin 26-da və mayın 11-də yenidən Omanın paytaxtında baş tutub.

Məsləhətləşmələrdə İran nümayəndə heyətinə xarici işlər naziri Abbas Əraqçi, Amerika nümayəndə heyətinə isə ABŞ Prezidentinin xüsusi nümayəndəsi Stiven Uitkoff başçılıq edir.