ABŞ-də Qəzzaya görə çaxnaşma: Blinkendən tarixi etiraf

ABŞ-nin dövlət katibi Entoni Blinken Dövlət Departamentinin İsrail və HƏMAS arasındakı münaqişəyə yanaşmada ölkədəki prezident administrasiyası ilə ciddi fikir ayrılıqlarının olduğunu etiraf edib.

Bu barədə “Washington Post” nəşri məlumat yayıb. Qeyd olunub ki, ölkədə bu fikir ayrılıqlarının müzakirəsi məqsədilə forumlar təşkil edilir və açıq müzakirələr aparılır.

“Bəzi insanlar bizim qəbul etdiyimiz yanaşmalarla razılaşmaya bilər və ya onların bundan daha yaxşı nələrin edilə biləcəyinə dair öz fikirləri ola bilər”, – deyə dövlət katibi vurğulayıb.

O həmçinin əlavə edib ki, Fələstindəki əhalinin vəziyyətinin yaxşılaşdırılması üçün daha çox iş görülməlidir.

Nəşrin məlumatına görə, ABŞ Dövlət Departamentinin əməkdaşları Ağ Evə Fələstin-İsrail münaqişəsinə yanaşmalarına yenidən baxmağı tələb edən məktub ünvanlayıblar. 5 səhifədən ibarət olan bu sənədi artıq ABŞ Dövlət Departamentinin və Beynəlxalq İnkişaf Agentliyinin 100 əməkdaşı imzalayıb.

Qeyd edək ki, məktubda Cozef Bayden oktyabrın 25-də etdiyi çıxışında İsraili dəstəkləyərək dezinformasiya yaymaqda ittiham olunur. Yazıda həmçinin İsrail və HƏMAS tərəflərinin girovları azad etməsi və bölgədə təcili atəşkəsin elan edilməsinə dair tələblər də var. Eyni zamanda, sənəddə Ağ Ev rəhbəri Qəzzada ölən fələstinlilərin sayına şübhə ilə yanaşdığına görə ciddi tənqid edilir.