ABŞ-dən iranlılara qarşı sərt qərar | Sanksiya siyahısında diqqətçəkən nüans - Baku TV

ABŞ, İran telekommunikasiya sənayesinin rəsmiləri və nümayəndələri də daxil olmaqla, 18 iranlıya viza məhdudiyyətləri tətbiq etmək qərarına gəlib.

Bu barədə ABŞ Dövlət Departamenti məlumat yayıb.

Məlumata görə, ABŞ dövlət katibi Marko Rubio 18 İran rəsmisi və telekommunikasiya sənayesi rəhbərinə, eləcə də onların yaxın ailə üzvlərinə viza məhdudiyyətləri tətbiq etmək üçün tədbirlər görür. Adları açıqlanmayan bu şəxslər son qarşıdurmalar da daxil olmaqla, İranda insan haqlarının pozulmasında iştirak edirlər.

Qeyd edək ki, ABŞ-nin bu cür məhdudiyyətləri artıq 58 şəxsə şamil olunub.

Bu arada, ABŞ açıq şəkildə bildirib ki, İran nüvə proqramını, o cümlədən uranı zənginləşdirmək imkanlarını tamamilə ləğv etməlidir və xəbərdarlıq edib ki, Tehran bu tələbləri yerinə yetirməzsə, digər variantlar, o cümlədən hərbi tədbirlər gündəmdə qalacaq. Bu barədə “Fox News” məlumat yayıb.

Məlumata görə, Vaşinqton istənilən razılaşmanın İranın nüvə proqramının, o cümlədən uranın zənginləşdirilməsi imkanlarının, tam ləğvi, həmçinin Tehranın ballistik raket proqramına məhdudiyyətlər qoyulması və HAMAS və “Hizbullah” kimi müttəfiq silahlı qruplara dəstəyin dayandırılması ilə nəticələnməli olduğunu müdafiə edir.