ABŞ-dən "Hizbullah"a xəbərdarlıq | Ağ Ev kömək edəcək, yoxsa...

İsrail-Livan sərhədində gərginlik hələ də davam edir. İsrail Müdafiə Ordusu bir sıra döyüş qüvvələrini və hərbi texnikasını Livanla sərhəd bölgəsinə köçürüb.

Tərəflər arasında baş verənlərə ABŞ də səssiz qalmayıb. Ölkə rəsmiləri “Hizbullah”ın liderlərinə xəbərdarlıq edib. Bildirilib ki, hərbi qruplaşma hücuma keçəcəyi təqdirdə ABŞ İsrailə özünü müdafiə etməyə kömək edəcək. Bu səbəbdən də “Hizbullah” Vaşinqtonun Təl-Əvivin müharibə ilə bağlı qərar qəbul etməsinə mane olmasını gözləməməlidir.

Eyni zamanda ABŞ rəsmiləri İran yönümlü HƏMAS kimi, lakin daha güclü və daha yaxşı silahlanmış bir qruplaşma ilə İsrail arasında baş verəcək müharibənin ciddi fəsadlar törədə biləcəyini də vurğulayıblar.

Ölkənin Dövlət Departamentinin sözçüsü Metyu Miller “Biz düşünürük ki, İsrail-Livan sərhədi boyunca münaqişənin diplomatik həlli olmalıdır. Çünki sərhəddə baş verənlər hər iki tərəfdən də onminlərlə ailənin evlərinə qayıtmasına mane olur” bəyanatı ilə çıxış edib.

Onu da qeyd edək ki, hazırda İsrailin müdafiə naziri Yoav Qallant ABŞ Prezidenti Cozef Baydenin köməkçiləri ilə danışıqlar aparmaq üçün Vaşinqtonda səfərdədir. Müzakirələrin İsrail-Livan sərhədindəki böhrana yönələcəyi güman edilir.

Xarici KİV-in yaydığı məlumata görə, nə “Hizbullah”, nə də İsrail tərəfi müharibə istəyir. Lakin hər gün müharibə ilə bağlı risk daha da artır. Bütün bunların fonunda, Vaşinqton Təl-Əvivə də xəbərdarlıq edib. Əgər tərəflər arasında irimiqyaslı müharibə başlayarsa, İsrailin müdafiəsi üçün yardım etmək prosesi də çətinləşə bilər. Bunun ən başlıca səbəbi “Hizbullah” hərbi qruplaşmasının coğrafi baxımdan İrana daha yaxın olmasıdır. Buna görə də potensial hücumlara qarşı daha sürətli cavabın verilməsi tələb olunur.