ABŞ-dən Ukraynaya dəstək | Rusiya Ordusu üstünlük qazandı, irəliləyir, amma...

“Ukrayna Ordusunu dünyada kifayət qədər qiymətləndirmirlər. Əgər Rusiya ilə barışıq şərtləri onları qane etməsə, ukraynalılar yalın əlləri ilə döyüşəcəklər”.

Atəşkəs üzrə danışıqların aparıldığı bir vaxtda ABŞ-nin Mərkəzi Kəşfiyyat İdarəsinin direktoru Con Retkliff belə açıqlama ilə çıxış edib.

O, ölkə Prezidenti Donald Trampın davamlı sülhün əldə olunmasına töhfə verəcək şərtlərlə müharibəni bitirmək istədiyini deyib. Əlavə olaraq Mərkəzi Kəşfiyyat İdarəsinin də Ağ Ev liderinin missiyasını dəstəkləmək üçün tədbirlər gördüyünü vurğulayıb.

Rusiyanın döyüş meydanında üstünlüyə malik olması və yavaş-yavaş irəliləməsi fikirləri ilə razılaşan ABŞ rəsmisi Kiyevə dəstəyini ifadə etməkdən də çəkinməyib.

“Bir neçə ildir ki, Ukrayna xalqı və Ordusu lazımi səviyyədə qiymətləndirilmir. Müşahidələrimə əsasən, əminəm ki, onlar davamlı sülh üçün lazımi şərtlərə malik olmadıqları təqdirdə, yəni məcburiyyət qarşısında qaldıqları halda yalın əlləri ilə döyüşəcəklər”, − deyə C.Retkliff bildirib.

Bu açıqlamanın ardınca Mərkəzi Kəşfiyyat İdarəsinin direktoru D.Trampın Rusiyanın öz istədiyini alacağı zaman yarana biləcək potensial təhlükədən xəbərdar olduğunu deyib.

“Ona görə də əgər danışıqlar uğurlu olarsa, hər iki tərəf maksimum səviyyədə öz istəklərinə nail ola bilməyəcək”, − deyə C.Retkliff vurğulayıb.