ABŞ Gürcüstanla bağlı hərəkətə keçir | Blinken təcili xəbərdarlıq etdi

ABŞ Dövlət katibi Entoni Blinken Gürcüstan hakimiyyətini Avropa Birliyinə üzvlük danışıqlarının dayandırılmasına etiraz edən nümayişçilərə qarşı zorakılığa görə pisləyib və Tbilisini daha sərt sanksiyalarla hədələyib.

Bu barədə Entoni Blinkenin yaydığı bəyanatda bildirilib.

“Birləşmiş Ştatlar “Gürcü Arzusu” Partiyasının Gürcüstan vətəndaşlarına, etirazçılara, media nümayəndələrinə və müxalifət xadimlərinə qarşı amansız və əsassız zorakılığını qətiyyətlə pisləyir. Dinc toplaşmaq və söz azadlığı hüquqlarından istifadə etdiyi üçün saxlanılan şəxslər dərhal azad edilməli, qanunsuz güc tətbiqinə görə məsuliyyət daşıyan məmurlar tam məsuliyyətə cəlb edilməlidir”, –o vurğulayıb.

E.Blinken rəsmi Vaşinqtonun Gürcüstan xalqı ilə həmrəy olduğunu da vurğulayıb: “Birləşmiş Ştatlar əvvəllər elan etdiyimiz ikitərəfli əməkdaşlığın hərtərəfli nəzərdən keçirilməsini davam etdirməklə yanaşı, əlavə sanksiyalar da daxil olmaqla, ixtiyarımızda olan vasitələrdən istifadə etməyə hazırlaşır”.

Qeyd edək ki, bundan əvvəl Dövlət Departamenti Tbilisinin AB-yə üzvlük danışıqlarını təxirə salmaq qərarına və etirazçılara qarşı güc tətbiqinə görə ABŞ-nin Gürcüstanla strateji tərəfdaşlığını dayandırdığını açıqlamışdı.