ABŞ-İran danışıqlarının görünməyən tərəfi | Tehranın əsl istəyi nədir?

İran yekun razılıq əldə olunana qədər ABŞ ilə müvəqqəti nüvə sazişi imzalamaq imkanını nəzərdən keçirir.

Bu barədə "Axios" portalı məlumat verib.

"İran hərtərəfli razılaşma üzrə danışıqlara başlamazdan əvvəl müvəqqəti nüvə sazişi üzərində işləməsi təklifi ilə çıxış etmək haqqında düşünür", ‒ deyə məlumatda bildirilib.

Nəşr vurğulayıb ki, müvəqqəti razılaşma təkcə İranın uranın zənginləşdirilməsi üzrə fəaliyyətinin bir hissəsinin dayandırılmasını və ehtiyatlarının azaldılmasını deyil, həm də BMT müfəttişlərinə Tehranın nüvə obyektlərinə daha geniş girişin verilməsini əhatə edə bilər.

Xatırladaq ki, ABŞ Prezidenti Donald Tramp martın 7-də İranın ali lideri Əli Xameneiyə göndərdiyi məktubda yeni nüvə sazişinin bağlanması üçün iki ay müddət təyin edib. Martın 27-də İran hakimiyyəti Oman vasitəsilə Vaşinqtona cavab göndərib və ABŞ ilə birbaşa danışıqlardan imtina edib, üçüncü ölkələrin vasitəçiliyi ilə danışıqlara razılıqlarını bildirib.

Aprelin 8-də İranın xarici işlər naziri Abbas Əraqçı Tehranın vasitəçilər yolu ilə ABŞ ilə danışıqlara üstünlük verdiyini nəzərə çatdırıb. O, aprelin 12-də İran və ABŞ nümayəndə heyətlərinin dolayı danışıqlar üçün Omanda görüşəcəyini bildirib. Daha sonra Ağ Ev danışıqların birbaşa olacağını qeyd edib.