ABŞ-İran münasibətləri hansı halda normallaşa bilər?

Ağ Evin mətbuat katibi Kerolayn Levitt bildirib ki, Prezident Donald Tramp ABŞ və İran arasında planlaşdırılan danışıqlardan nəticə gözləyir.

Əvvəlcə Türkiyədə keçirilməsi nəzərdə tutulan görüşün niyə Omana köçürüldüyü ilə bağlı jurnalistlərin sualını cavablandıran Levitt bildirib ki, Prezident üçün diplomatiya əsas prioritet olaraq qalır.

“İstər müttəfiqlərimiz, istərsə də düşmənlərimiz olsun, dünyanın hər yerindəki ölkələrlə münasibət qurarkən diplomatiya həmişə onun ilk seçimidir. Buna görə də xüsusi elçi Stiv Uitkoff və Cared Kuşner həmin danışıqlar üçün Omana səfər edəcəklər. Prezident onlardan yeniliklər gözləyir”, – deyə Levitt qeyd edib.

O eyni zamanda vurğulayıb ki, bu danışıqlar ABŞ-nin regionda hərbi mövcudluğunu artırdığı bir dövrdə keçirilir və Vaşinqton İranla mümkün razılaşmanın əldə olunub-olunmayacağını məhz bu görüşdən sonra dəyərləndirəcək.

Onun sözlərinə görə, diplomatik proses davam etsə də, Tehranın unutmamalı olduğu bir məqam var:

“Bu danışıqlar aparılarkən İrana xatırlatmaq istərdim ki, Prezidentin dünya tarixinin ən güclü ordusunun baş komandanı kimi diplomatiyadan başqa bir çox variantı da var”.

Eyni zamanda bildirilib ki, ABŞ-İran arasında normal münasibətlərin davam edib-etməyəcəyi isə bu məsləhətləşmələrin nəticəsindən asılı olacaq.