ABŞ İranın qarşısında iki seçim qoydu | Ağ Ev rəsmisindən sərt çıxış

ABŞ İrana himayə etdiyi husilərlə bağlı xəbərdarlıq edərək BMT Təhlükəsizlik Şurasını məsələ ilə bağlı təcili tədbir görməyə çağırıb.

Ölkənin təşkilatda İslahat və İdarəetmə üzrə məsul nümayəndəsi Kristofer Lu Şuran iclas zamanı Ağ Evin rəsmi Tehranla münaqişəyə can atmadığını vurğulayıb.

O, çıxışı zamanı mövcud vəziyyəti düzəltmək üçün İrana iki yol göstərib:

“ABŞ İranla qarşıdurmaya can atmır. Rəsmi Tehranın hazırkı situasiyada iki seçimi var: ya hazırkı mövqeyini qoruyub saxlamaq, ya da hücumlara dəstəyini dayandırmaq. Əgər İranın yardımı dayanarsa, husilər Qırmızı dəniz və Ədən körfəzində üzən ticarət gəmilərini izləmək və onlara zərbələr endirməkdə çətinlik çəkəcəklər.

Xatırlatmaq istəyirəm ki, husilərə istənilən növ silah və sursatların verilməsi Təhlükəsizlik Şurasının 2216 saylı qətnaməsinin pozulması deməkdir. Təşkilatın üzvü olan bütün dövlətlər bu qətnamə üzrə öz öhdəliklərinə əməl etməlidir”.

Xatırladaq ki, husilər dekabrın 31-də Qırmızı dənizdə ABŞ-nin yük gəmisini ələ keçirməyə cəhd edib, nəticədə 10 üzvünü itirib.

Ümumilikdə isə husilər Qırmızı dənizdə ABŞ-nin gəmilərinə 2023-cü ilin noyabrın 19-dan bu günə qədər 20-dən çox hücum həyata keçiriblər. Sonuncu belə hadisə isə yanvarın 3-də baş verib.