ABŞ-nin bu addımı vəziyyəti daha da gərginləşdirdi | Mdinaradzedən reaksiya

ABŞ insan haqlarının pozulmasında iştirak etdiyi iddia edilən 4 Gürcüstan vətəndaşına qarşı sanksiyalar tətbiq edib.

Bu barədə Dövlət Departamentinin Mətbuat Xidmətinin yaydığı məlumatda deyilir.

Sənəddən məlum olur ki, sanksiya siyahısına Gürcüstan Daxili İşlər Nazirliyinin xüsusi tapşırıqlar üzrə departamentinin rəhbəri Zviad Xarazişvili, onun müavinlərindən biri və ciddi insan hüquqları pozuntularında iştirak etdiyi iddia edilən iki məmur daxildir.

Bundan əlavə, bəyanatda qeyd olunduğu kimi, ABŞ yüksəkvəzifəli məmurlar, sahibkarlar, hüquq-mühafizə orqanlarının əməkdaşları və qanunvericilər daxil olmaqla, 60-dan çox Gürcüstan vətəndaşı və onların ailə üzvləri üçün viza məhdudiyyətləri tətbiq edir.

Sanksiya siyahısına daxil edilmək ABŞ-dəki aktivlərin dondurulması və ABŞ vətəndaşları və şirkətlərinin bu işdə iştirak edənlərlə iş aparmasının qadağan edilməsi deməkdir.

“ABŞ-nin Gürcüstan Daxili İşlər Nazirliyinin nümayəndələrinə və digər şəxslərə qarşı tətbiq etdiyi sanksiyalar ölkədə oktyabrın 26-da keçiriləcək parlament seçkisinə müdaxilədir”.

Bunu hakim Gürcü Arzusu – Demokratik Gürcüstan Partiyasının icraçı katibi Mamuka Mdinaradze mətbuat konfransında bildirib.

“Bu, bir tərəfdən polisə, digər tərəfdən gürcü xalqının seçiminə və iradəsinə təsir etmək cəhdidir. Bu, Gürcüstan seçkisinə müdaxilədir”, – deyə M.Mdinaradze vurğulayıb.

Siyasətçinin sözlərinə görə, seçki yaxınlaşdıqca partiya ABŞ-dən daha sərt sanksiyalar və bəyanatlar gözləyir.