ABŞ-nin hərbi əməliyyat planları ortaya çıxdı | Tramp isə dedi ki...

ABŞ-də “The Atlantic” jurnalının baş redaktoru Cefri Qoldberq səhvən yüksəkvəzifəli şəxslərin olduğu qrupa əlavə edilib və məxfi danışıqların şahidi olub.

Belə ki, Cefri ABŞ Prezidenti Donald Trampın milli təhlükəsizlik üzrə müşaviri Mayk Uolts tərəfindən Yəməndə husilərə qarşı çox məxfi hərbi əməliyyatları müzakirə etmək üçün yaradılan çata əlavə edilib.

Mövzu barədə açıqlama verən jurnalist bildirib ki, martın 11-i Maykl Uolts onu Yəmənə endiriləcək hərbi zərbələrlə bağlı qrup söhbətinə daxil edib. İki gün sonra isə hərbi əməliyyatlar barədə danışıqlar başlayıb.

O bildirib ki, martın 15-i ABŞ Yəməndə husi hədəflərini bombalayıb, lakin C.Qoldberq hadisədən təxminən 2 saat əvvəl artıq bunun olacağını bilib:

“Bunu bilməyimin səbəbi o idi ki, ABŞ müdafiə naziri Pit Heqset sözügedən qrupa müharibə planını mesajla göndərmişdi. Plana silah paketləri, hədəflər və vaxt haqqında dəqiq məlumatlar daxil idi. Maykl Uoltsla tanışlığımın olmasına baxmayaraq, düşündüm ki, kimsə məni tələyə salmaq üçün özünü M.Uolts kimi təqdim edərək qrupa əlavə edib”.

Ağ Evin Milli Təhlükəsizlik Şurasının sözçüsü Brayan Hughes məsələnin mediada müzakirəsindən sonra açıqlama verərək gündəmə gələn mesaj mövzusunun necə baş verdiyinin araşdırıldığını bildirib.

ABŞ Prezidenti Donald Tramp isə mövzu ilə bağlı suala “Mənim bu mövzuda heç bir məlumatım yoxdur”, ‒ deyə cavab verib.

“Atlantic” jurnalını oxumadığını deyən Tramp hadisədən xəbərsiz olduğunu, lakin sözügedən səhvin Yəməndəki hücumlara heç bir təsirinin olmadığını da qeyd edib. Pit Heqset isə açıqlama verərək Yəmən müharibəsi planları ilə bağlı SMS göndərilməsini yalan adlandırıb, jurnalisti saxtakarlıqla məşğul olmaqda ittiham edib.