ABŞ Prezidenti Ukrayna-Rusiya müharibəsi ilə bağlı hərəkətə keçdi | Danışıqlara Zelenski də...

“ABŞ Ukrayna münaqişəsinin həlli üçün Rusiya ilə işləməyə, Rusiya və ABŞ liderlərinin təşəbbüsü ilə aparılan danışıqları davam etdirməyə hazırdır”.

Bu barədə ABŞ-nin milli təhlükəsizlik üzrə müşaviri Mayk Uolts “Fox News”a müsahibəsində bildirib.

O əlavə edib ki, Tramp Putinlə birbaşa olaraq danışıqlara başlayıb, proses gələn həftə də davam etdiriləcək. “ABŞ Prezidenti münaqişəni dayandırmaq üçün tez bir zamanda hərəkətə keçməyin tərəfdarıdır”, – deyə amerikalı rəsmi cavab verib.

“Bloomberg” agentliyinin məlumatına görə, iki ölkə lideri arasında telefon danışığı baş tutub, onlar Ukraynada hərbi əməliyyatların dayandırılması məsələsini, ikitərəfli münasibətləri və bir sıra digər mövzuları müzakirə ediblər, həmçinin təmasların davam etdirilməsi və şəxsi görüşün təşkili barədə razılığa gəliblər.

Görüşün gələn həftə Səudiyyə Ərəbistanında baş tutacağı vurğulanıb. Söhbət zamanı Putin və Tramp həmçinin qeyd ediblər ki, Baydenin prezidentliyi dövründə iki ölkə arasında münasibətlərə xələl gəlib. Donald Tramp isə “Fox News”a açıqlamasında nəzərdə tutulan görüşün tez bir zamanda baş tutmayacağını deyib və əlavə edib ki, Ukrayna Prezidenti Volodimir Zelenski də dəvət olunacaq.