ABŞ Prezidenti və İsrailin Baş naziri Trampa dəstəklərini ifadə etdilər

ABŞ Prezidenti Co Bayden seçkidəki rəqibi respublikaçı Donald Trampa qarşı silahlı insidenti pisləyib.

Bu barədə Amerika lideri “X” platformasındakı hesabında paylaşım edib.

“Onun təhlükəsiz və yaxşı olduğunu eşitdiyimə görə şadam. Mən onun, ailəsi və mitinqdə olanların hamısı üçün dua edirəm, əlavə məlumat gözləyirik”, – deyə o bildirib.

Bununla yanaşı, dövlət başçısı Amerikada bu cür zorakılığa yer olmadığını bildirərək amerikalıların bunu pisləmək üçün bir millət kimi birləşməli olduğunu vurğulayıb.

Həmçinin İsrailin Baş naziri Benyamin Netanyahu da D.Trampa dəstəyini ifadə edib. O, “X”dəki hesabında “Sara və mən prezident D.Trampa açıq hücumdan sarsıldıq. Onun təhlükəsizliyi və tezliklə sağalması üçün dua edirik” deyə bildirib.