ABŞ Silahlı Qüvvələri narkotacirlərə məxsus gəmiyə zərbə endirib

ABŞ fevralın 9-da Sakit okeanın şərq hissəsində narkotacirlərə məxsus gəmiyə zərbə endirib, nəticədə iki nəfər həlak olub.

Bu barədə ABŞ Silahlı Qüvvələrinin Cənub Komandanlığı "X" sosial şəbəkəsində məlumat yayıb.

"Kəşfiyyat təsdiqləyib ki, gəmi Sakit okeanın şərq hissəsində məlum narkotik qaçaqmalçılığı marşrutları üzrə hərəkət edib və narkotrafik üçün istifadə olunub", – deyə paylaşımda bildirilib.

Komandanlıq həmçinin qeyd edib ki, gəmidə olanlardan biri sağ qalıb, hərbçilər axtarış-xilasetmə əməliyyatının keçirilməsi üçün bu barədə ABŞ Sahil Mühafizəsinə məlumat veriblər.

Qeyd edək ki, bu zərbələr ABŞ-nin Cənub Nizə Əməliyyatının tərkib hissəsidir və Prezident Donald Tramp administrasiyası tərəfindən narkotik qaçaqmalçılığı ilə mübarizə adı altında həyata keçirilir.

Əməliyyat 2025-ci ilin sentyabrında başlayıb və hədəf olaraq narkotik daşımaqda şübhəli bilinən gəmi və qayıqlar götürülüb. Kampaniya daxilində ən azı 38 zərbə qeyd olunub və 130-a yaxın şəxsin həlak olduğu bildirilir. Lakin ABŞ tərəfi bəzi hallarda gəminin narkotik daşıması ilə bağlı açıqlama versə də, bu iddiaların beynəlxalq müstəvidə sübutu barədə sərt müzakirələr var.