ABŞ Suriya ərazilərinə zərbələr endirib - Baku TV

ABŞ Silahlı Qüvvələri Suriyada İŞİD terror qruplaşmasının döyüşçülərinə qarşı antiterror əməliyyatına başlayıb.

"Bu addım Palmirada amerikalı hərbçilərə edilən hücuma cavab olaraq atılıb".

Bunu ABŞ-nin müharibə naziri Pit Heqset açıqlayıb.

Onun sözlərinə görə, əməliyyat İŞİD döyüşçülərinin, infrastruktur obyektlərinin və silah anbarlarının məhv edilməsinə yönəlib.

Nazir vurğulayıb ki, ABŞ-nin hərəkətləri 13 dekabrda Suriyanın Palmira şəhərində amerikalı hərbçilərə edilən hücuma birbaşa cavabdır.

"Bu, yeni müharibənin başlanğıcı deyil, qisasın elanıdır", – deyə P.Heqset bildirib.

O həmçinin qeyd edib ki, əməliyyat zamanı ABŞ hərbçiləri artıq bir sıra döyüşçüləri zərərsizləşdirib və fəaliyyətlərini davam etdirməyə niyyətlidirlər.

"Biz düşmənlərimizi izlədik və öldürdük. Davam edəcəyik", – deyə Pentaqon rəhbəri əlavə edib.

Qeyd edək ki, əsas zərbə İŞİD-in Deyr əz-Zor vilayətindəki mövqelərinə endirilib.

Hazırda Suriyanın şimalında bombardmanlar dayandırılıb, lakin ABŞ Hərbi Hava Qüvvələrinin təyyarələri bölgədə patrul uçuşlarını davam etdirir.