ABŞ-Ukrayna birgə iqtisadi təşəbbüsləri nəzərdən keçirilib

Rusiya-Ukrayna müharibəsinin həlli istiqamətində Floridada keçirilən danışıqlarda ABŞ ilə Ukrayna nümayəndələri atəşkəs və gərginliyi azaltmaq üçün addımların atılmasının vacibliyini vurğulayıblar.

Bu barədə Dövlət Departamentinin yaydığı məlumatda deyilir.

Sənədə əsasən, iki ölkənin nümayəndələri məsləhətləşmələr zamanı vurğulayıblar ki, atəşkəs və gərginliyin azaldılması istiqamətində addımlar münaqişənin yenidən başlanmasının qarşısını almaq və Ukraynanın bərpası üçün hərtərəfli planı həyata keçirmək üçün zəruridir.

ərəflər həmçinin ABŞ-Ukrayna birgə iqtisadi təşəbbüslərini və uzunmüddətli bərpa layihələrini dəstəkləmək məqsədi daşıyan gələcək rifah gündəmini ayrıca nəzərdən keçiriblər.

Xatırladaq ki, danışıqlarda ABŞ Prezidenti Donald Trampın xüsusi nümayəndəsi Stiv Uitkoff və amerikalı sahibkar Cared Kuşner iştirak edib. Ukrayna tərəfini Milli Təhlükəsizlik və Müdafiə Şurasının katibi Rustem Umerov və Baş Qərargah rəisi general Andrey Qnatov təmsil edib.