ABŞ Ukraynaya bununla bağlı icazə verə bilər | Müharibə payızda şiddətlənəcək, yoxsa...?

Ukrayna ABŞ-dən Rusiyanın dərinliklərinə zərbə endirmək üçün icazə almağa çalışır.

Ukrayna Prezidenti Volodimir Zelenski və komandası belə hesab edir ki, müharibəni dayandırmağın yeganə yolu toqquşmaları Rusiya ərazisinə keçirməkdir. Kurska hücuma Rusiyanın çox da sərt cavab verməməsi Kiyevi cəsarətləndirib.

"The Times" nəşri Britaniya rəsmilərinə istinadən yazıb ki, ABŞ Ukraynaya BMT Baş Assambleyasının sentyabrın 22-23-də planlaşdırılan görüşünə qədər Rusiyanın dərinliklərinə zərbə endirməyə icazə verə bilər. Bununla bağlı Cozef Bayden Administrasiyası daxilində müzakirələrin getdiyi bildirilir.

Böyük Britaniya və Fransa Kiyevin bu təşəbbüsünü dəstəkləyir, ancaq Ukrayna hədəflərin müəyyən edilməsi ilə bağlı ABŞ-dən icazə almalıdır. Qərbin və Ukraynanın bu həmlələrinə Rusiyanın nə cavab verəcəyi isə maraqla gözlənilir.

Moskva əvvəlki dövrlərdən fərqli olaraq Qərbi artıq nüvə silahı ilə təhdid etmir. Ancaq Kremldə Ukraynaya qarşı sərt addımların atılmasının müzakirə edildiyi heç kimə sirr deyil. Artıq bununla bağlı real addımlar atılır və Rusiyanın Sibirdə nüvə sınağı həyata keçirmək istədiyi bildirilir. Əgər bu baş verərsə, Rusiyanın müstəqillik qazandıqdan sonrakı ilk nüvə sınağı olacaq.

Kremlin hazırda əsas missiyası Qərbi maksimum şəkildə Ukraynaya dəstəkdən çəkindirməkdir. Ehtimal ki, Moskvanın daha bir planı Ukraynanın infrastruktur xətlərinə zərbələr endirmək olacaq. Bu isə qarşıdan gələn qış aylarında Ukraynada ciddi enerji və istilik problemi yarada bilər. Hazırda Volodimir Zelenski Administrasiyasının ən qorxduğu məqam məhz budur.

Ukrayna hökuməti ölkənin, əsas da paytaxt Kiyevin enerji-istilik sisteminin gücləndirilməsi üçün bütün texniki imkanları gözdən keçirir.

Rusiya isə ərazisinə atılan uzaqmənzilli raketlərə eyni cür qarşılıq verəcəyini açıqlayıb. Moskva İrandan ballistik raket idxalını sürətləndirib. Məhz bu raketlərin əsas hədəfləri Ukraynanın dərinliklərində strateji obyektlər olacaq. Buna görə də Qərb İrana bu raketləri Rusiyaya verməməsi barədə maksimum təzyiq edir.

İstənilən halda bu payızda müharibənin ən şiddətli dövrlərindən birinin yaşanacağı şübhəsizdir.