ABŞ və Avropa İttifaqı Gürcüstanı hədələyib

Gürcüstan Rusiya ilə birbaşa uçuşları bərpa edərsə, çox ciddi problemlərlə üzləşə bilər. Artıq ABŞ və Avropa İttifaqı rəsmi Tblisini sanksiyalarla hədələyib.

Bu arada, Gürcüstanın İqtisadiyyat Nazirliyi mayın 15-dən Rusiyaya sərbəst səfər edə biləcək Gürcüstan vətəndaşları üçün Rusiya tərəfindən viza rejiminin ləğv edilməsinə reaksiya verib. Nazirlik Qərbin sanksiyaları altında olmayan Rusiya aviaşirkətlərinə daşıma icazəsi verməyə hazır olduqlarını açıqlayıb.

Eyni zamanda Gürcüstanın xarici işlər naziri İlya Darçiaşvili qeyd edib ki, Moskvanın viza rejimindən imtina etməsi onun ölkəsinin vətəndaşlarının gündəlik həyatını asanlaşdıracaq. İlkin mərhələdə Moskva və Tbilisini ən azı yeddi birbaşa reysin birləşdirəcəyi gözlənilir. İki ölkə arasında diplomatik münasibətlərin olmamasına baxmayaraq, Rusiya XİN-i də bu addımın iki dövlətin vətəndaşları arasında təmasları asanlaşdırmaq məqsədilə atıldığını qeyd edib.

Qərb isə Rusiyanın Gürcüstanla viza rejimini ləğv etmək təşəbbüsünə qarşı çıxır. Avropa İttifaqının xarici siyasət xidmətinin nümayəndəsi Piter Stano Gürcüstanı aviasiya sahəsində Rusiyaya qarşı sanksiya rejimini dəstəkləməyə və Rusiya təyyarələrini öz ərazisinə buraxmamağa çağırıb. O xatırladıb ki, Tbilisi hələ də Aİ-yə üzv olmaq üçün namizəd statusu almağa çalışır.

ABŞ Dövlət Departamenti də Moskva ilə Tbilisi arasında birbaşa uçuşların bərpa olunacağı təqdirdə açıq şəkildə Gürcüstanı məhdudlaşdırıcı tədbirlərlə hədələyib.