ABŞ və Avropanın sanksiyaları Ukraynaya sülh gətirəcək?

“Belə bir fikir var ki, Rusiya neftinin ixracına dair Qərbin sanksiyaları mənasızdır. Çünki bazarda yük çatdırılıması ilə bağlı başqa üsullar mövcuddur”.

“Reuters”in məlumatına görə, Rusiya istənilən sanksiya maneəsini aşa biləcək. Çünki ABŞ “Lukoil” və “Rosneft”ə qarşı məhdudiyyət tətbiq etsə də, dollardan istifadə etməyən bank sxemi üzrə çoxsaylı vasitəçilər var. Bu isə Rusiya neftinin ixracına olan məhdudiyyətin qısamüddətli olması və genişmiqyaslı xarakter almaması ilə nəticələnəcək. Yəni sanksiyalar mənasız vaxt itkisidir.

“Rusiyanı Çin və Hindistan kimi alıcılardan məhrum etmək də effektiv olmayacaq”, ‒ deyə yazıda bildirilir.

Amma sanksiyalar Rusiya neftini bazarda saxlayaraq Moskvanın gəlirlərinin azaldılmasına yönəlibsə, bu, daha ağlabatandır. Çünki Rusiya neftinin ən böyük alıcıları olan Hindistan və Çindəki zavodlar risk altına düşəcək. Bu isə Rusiya neftinin endirimli qiymətlə alınmasını şərtləndirəcək. Belə deyək, Rusiya öz iqtisadiyyatını həyatda saxlamaq üçün nefti su qiymətinə satmalı olacaq.

Rusiyanın neft şirkətlərinin dollarla işləyən qlobal bank sistemindən uzaqlaşdırılması da Moskvanın gəlirinin azalmasına gətirəcək. Belə ki, maliyyə əməliyyatlarında vasitəçilərə ayrılan pul və neftin endirimli qiyməti məhsulun maya dəyərindən ucuz satılmasına səbəb olacaq.

“Reuters”də yayılan məlumata görə, bütün bu risklərə baxmayaraq, sanksiyalar Rusiya Prezidenti Vladimir Putinin Ukrayna ilə bağlı planlarına təsir etmir.