ABŞ və Ukrayna razılaşdı | Tramp-Zelenski danışığının detalları

“ABŞ Prezidenti Donald Tramp və Ukrayna lideri Volodimir Zelenski arasında telefon danışığı yaxşı keçib. Zelenski ABŞ-nin dəstəyinə görə Trampa təşəkkür edib”.

Bunu Ağ Evin mətbuat katibi Kerolayn Livitt jurnalistlərə açıqlamasında deyib.

Onun sözlərinə görə, telefon danışığı zamanı Zelenski Trampdan mülki insanları qorumaq üçün əlavə hava hücumundan müdafiə sistemləri, xüsusilə “Patriot” raket sistemləri istəyib:

“ABŞ Prezidenti Zelenskinin xahişinə müsbət cavab verib. Donald Tramp xüsusilə Avropada mövcud olan raketlər üzərində birgə işləməyə razılıq verib. Bundan əlavə, Ukraynaya müdafiə baxımından kəşfiyyat məlumatlarının ötürülməsi davam edəcək”.

Ağ Evin sözçüsü bildirib ki, Tramp Zelenskiyə Putinlə telefon söhbəti və müzakirə olunan əsas məsələlər barədə tam məlumat verib.

Liderlər Kurskdakı vəziyyəti nəzərdən keçiriblər və döyüş meydanında vəziyyətin inkişafı ilə bağlı müdafiə qərargahları arasında yaxından məlumat mübadiləsi aparmağa razılaşıblar.

Kerolayn Livitt qeyd edib ki, Tramp Ukraynadakı müharibəni əbədi olaraq bitirməkdə qərarlıdır:

“Biz heç vaxt sülhə bu qədər yaxın olmamışıq. Prezident Tramp sayəsində buradayıq. Bir neçə il əvvəl bu müharibədə qismən atəşkəsə nail olmaq mümkün deyildi”.

Ağ Evin mətbuat katibinin sözlərinə görə, hər iki lider enerji infrastrukturlarına hücumla bağlı qismən atəşkəs, eləcə də ABŞ və Ukraynadan olan ekspert qruplarının yaxın günlərdə Səudiyyə Ərəbistanında görüşəcəyi barədə razılığa gəliblər.