ABŞ xarici vətəndaşların təxliyəsində qarant rolunda

İsrail və HƏMAS arasında gedən döyüşlərdə yaralanan və ərazini tərk etmək istəyən xarici pasport sahiblərinin ABŞ-nin nəzarəti altında Qəzza ilə Misiri birləşdirən “Rəfah” sərhəd-keçid məntəqəsi vasitəsilə köçməsinə imkan verəcək qərar Qətərin vasitəçiliyi ilə qəbul edilib.

“Al Arabiya News”un verdiyi məlumata görə, artıq ilk köç edənlər qeydə alınır.

Misir Səhiyyə Nazirliyindən bildirilib ki, ilk yaralı qəzzalılar “Rəfah” keçidi vasitəsilə Misirə təxliyə ediliblər.

Misir Rəfahdan 15 kilometr aralıda Şeyx Zuveyd şəhərində səhra xəstəxanası hazırlayıb. Bu səyyar xəstəxanada yer az olarsa, Qəzzadan təxliyə edilənlər İsmailiyyə şəhərindəki yerli xəstəxanaya göndəriləcəklər.

İlkin məlumatlara görə, yaxın günlərdə 81 yaralı və 500-dən çox xarici pasport sahibinin “Rəfah” sərhəd-buraxılış məntəqəsi vasitəsilə Misirə aparılacağı gözlənilir. “Rəfah” keçid məntəqəsinin təxliyə üçün nə qədər açıq qalacağı məlum deyil.