ABŞ yeni qanun layihəsi üçün hərəkətə keçdi | Sanksiya hansı şirkətlərə aiddir?

ABŞ hökuməti Çinin süni intellekt texnologiyalarının idxalını ciddi şəkildə məhdudlaşdırmağa yönəlmiş qanun layihəsini qəbul etməyə hazırlaşır. Qadağa Çində hazırlanmış proqram və aparat da daxil olmaqla süni intellektin həm maddi, həm də qeyri-maddi komponentlərini əhatə edəcək. Qanun pozuntusuna görə 20 ilədək həbs cəzası nəzərdə tutulur.

Bu barədə “iPhones.ru” nəşri məlumat yayıb.

Sanksiyalar təkcə Çin şirkətlərinə deyil, həm də bu ölkənin təhsil müəssisələrinə, elmi-tədqiqat laboratoriyalarına, eləcə də onların adından fəaliyyət göstərən bütün şəxslərə aiddir. Qanunu pozan fiziki şəxslər 1 milyon, hüquqi şəxslər isə 100 milyon dollar cərimələnəcək. Qanun pozuntusuna yol verən xarici vətəndaşları deportasiya gözləyir.

Harvard Universitetinin Berkman Klein Mərkəzindən Ben Bruks qanun layihəsini ABŞ-də süni intellektin tənzimlənməsi üçün “ən aqressiv” təklif adlandıraraq bunun açıq mənbə təcrübələrini effektiv şəkildə məhv edəcəyini söyləyib.

Qeyd edək ki, Çinin “DeepSeek” proqramı “ChatGPT”ni geridə qoyub. “Nvidia” Çinin bu süni intellekt startapına görə yarım trilyon dollar dəyər itirib. Bu, ABŞ fond bazarı tarixində ən böyük gündəlik eniş kimi qeydə alınıb.