Ağıllı yadplanetli həyatın varlığına dair məlumatlar nə vaxt dərc olunacaq? | Detallar açıqlandı

Astrofiziklər ağıllı yadplanetli həyatın mövcudluğuna dair sübutlar aşkar ediblər və onların varlığına dair məlumatlar tezliklə dərc olunacaq.

Bunu NASA ilə əməkdaşlıq edən sənədli film rejissoru Saymon Holland deyib.

“Biz qalaktikamızda insana aid olmayan Yerdənkənar zəka kəşf etmişik və insanların bundan xəbəri yoxdur”, – o bildirib.

Oksforddan olan “Kəşfə yol açan dinləmə” layihəsinin komandası siqnalı təhlil etdiklərini təsdiqləyib, lakin ehtimal olunan mənbəni açıqlamayıblar.

“Onlar təfərrüatı axtarırlar, ona görə də xəbərin dərci gecikir”, – deyə S.Holland layihədəki mənbələrinə istinadən deyib.

Qeyd edək ki, rejissorun istinad etdiyi “Breakthrough Listen” 2016-cı ilin yanvarında israilli sahibkar, investor və sovetəsilli fizik Yuri Milnerin təşəbbüsü ilə 100 milyon dollar dəyərində qeyri-kommersiya tədqiqat layihəsi kimi işə başlayıb. Qəribə radiosiqnal ilk dəfə 2019-cu ildə Avstraliyanın Parkes Rəsədxanası tərəfindən müəyyən edilib. 2021-ci ildə layihənin astronomları bunun insan fəaliyyəti nəticəsində yaranan siqnal olduğunu güman edirdilər.

Rejissorun iddiasından belə görünür ki, mütəxəssislər indi siqnalla bağlı fikirlərini dəyişiblər.