Alimlərdən maraqlı kəşf | Herkulanum kitabxanasının sirləri açılır?

Alimlər Herkulanum kitabxanasında tapılmış qədim papiruslardan birini süni intellektin köməyi ilə virtual şəkildə açmağı bacarıblar.

Bu əlamətdar hadisə Vezuvi vulkanının 79-cu ildə püskürməsi zamanı kül altında qalan qədim Roma şəhəri olan Herkulanumun tarixi irsini daha dərindən öyrənməyə imkan yaradır.

Herkulanumun villalarından birində yerləşən “Papiruslar villası” 1800-dən çox qədim əlyazmanı qoruyub saxlayıb. Bu kitabxana antik dövrün tam şəkildə qorunub saxlanmış yeganə kitabxanası hesab olunur.

İlk dəfə XVIII əsrdə arxeoloqlar tərəfindən aşkar edilən bu papiruslar vulkanik istilik və kül nəticəsində kömürə çevrildiyindən indiyə qədər onların açılması və oxunması mümkün olmurdu. Lakin yeni texnologiyalar sayəsində tədqiqatçılar əlyazmaların daxili mətnini virtual olaraq oxumağa nail olublar.

Kəşf qədim Roma dövrünün ədəbiyyatı, fəlsəfəsi və elmi bilikləri haqqında yeni məlumatların əldə olunmasına imkan yaradacaq. Alimlər bu texnologiyanın gələcəkdə digər qədim əlyazmaların açılması üçün də istifadə ediləcəyinə inanırlar.