Alman raketləri Moskvanı vura bilər | Olaf Şolts

“Taurus” qanadlı raketlərini Ukraynaya vermək istəmirik”.

Bu barədə Almaniya Kansleri Olaf Şolts açıqlama verib.

Bildirib ki, sözügedən raket 500 kilometr uçuş məsafəsinə malikdir və düzgün istifadə olunmasa, Moskvadakı hədəfləri vura bilər.

Kansler vurğulayıb ki, əgər Almaniya “Taurus” qanadlı raketlərini tədarük etməli olsa, onların istifadəsində bilavasitə iştirak etməlidir, ancaq bu, mümkün deyil. O.Şolts çıxışında bir daha ölkəsinin müharibəyə cəlbedilmə riskini əsas gətirərək Ukraynaya sözügedən silahların verilməsinin əleyhinə olub.

Məlumat üçün bildirək ki, Almaniya ABŞ-dən sonra Ukraynanı ən çox hərbi yardımla təmin edən 2-ci ölkədir. Lakin buna baxmayaraq, Olaf Şolts rəsmi Kiyevin tələb etdiyi raketlərin göndərilməsinin kəskin şəkildə əleyhinədir. Eyni zamanda o, Fransa Prezidenti Emmanuel Makronun Ukraynaya qoşun göndərilməsi fikrinə də qarşı çıxaraq Almaniya hərbçilərinin müharibəyə göndərilməyəcəyini bildirib.