Almaniya Ukraynaya hərbçi göndərəcək?

“Ukraynada sülhün təmin edilməsi adı altında Almaniya hərbçilərinin bu ölkəyə göndərilməsi çağırışları son dərəcə təhlükəlidir”.

Bu barədə Almaniyanın Ağıl və Ədalət İttifaqı Partiyasının xarici siyasət üzrə eksperti Sevim Dağdələn “X” hesabında yazıb.

O bildirib ki, Avropa Birliyinin bayrağı altında Almaniya hərbçilərinin Ukraynaya göndərilməsi Rusiya ilə qarşıdurmanı daha da dərinləşdirər.

Ekspert eyni zamanda Kiyevə silah tədarükünə və Bundesverin Ukraynaya göndərilməsinə də qəti şəkildə qarşı çıxıb.

Qeyd edək ki, dekabrın 26-da Avropa Xalq Partiyasının və onun Avropa Parlamentindəki fraksiyasının rəhbəri Manfred Veber Almaniya hərbçilərinin Avropa bayrağı altında Ukraynada sülhün təmin olunmasında iştirakını təklif edib.

Bu arada Ukrayna Rusiya Ordusunun itkiləri haqda məlumatı yeniləyib.

Ölkənin Baş Qərargahının açıqlamasına görə, Rusiyanın indiyə qədər 11 469 tankı, 23 831 zirehli döyüş maşını, 35 557 artilleriya sistemi məhv edilib.

Bundan başqa, 1264 Hava Hücumundan Müdafiə sistemi, 434 hərbi təyyarəsi və 347 helikopteri sıradan çıxarılıb.