Almaniya və ABŞ Ukraynaya tank verməyə çəkinir

Müdafiə Təmas Qrupunun Almaniyanın Ramştayn şəhərində keçirilən iclasında Ukraynaya “Leopard” tanklarının tədarükü ilə bağlı qərar qəbul edilməyib.

Bunu Almaniyanın müdafiə naziri Boris Pistorius deyib. O bildirib ki, ölkənin döyüş tankının ixrac lisenziyası var və buna görə də digər ölkələr öz "Leopard 2"sini Ukraynaya göndərmək üçün onun icazəsinə ehtiyac duyurlar. Nazir həmçinin qeyd edib ki, Almaniya Ukraynaya tank tədarükündən imtina edən yeganə ölkə deyil.

ABŞ-nin müdafiə naziri Lloyd Ostin də mətbuat konfrasında ABŞ istehsalı olan “M1 Abrams” tanklarının Ukraynaya verilməsinə dair razılıq əldə olunmadığını bildirmişdi. Ancaq Portuqaliya Ukraynaya zirehli transportyorlar, döyüş sursatları, elektrik generatorları və tibbi avadanlıqlar verməyə, habelə Ukrayna Silahlı Qüvvələrinin Avropada təlimi üçün öz hərbi personalını ayırmağa hazırdır.

Bu barədə ölkənin Milli Müdafiə Nazirliyi rəsmi saytında müvafiq məlumat yayıb. Sənəddə bildirilir ki, Portuqaliya Ukraynaya ikinci partiyanı − 14 ədəd M113 zirehli transportyoru, 8 generator, 120 mm-lik döyüş sursatları və 2 ton tibbi avadanlıq göndərəcək.