Almaniya və Britaniyanın Ukraynaya hərbi dəstəyi davam edir

Böyük Britaniya Ukraynaya hava hücumundan müdafiə sahəsində 685 milyon avro məbləğində böyük hərbi yardım paketi ayırdığını elan edib.

Bu barədə Britaniyanın müdafiə naziri Con Hili bildirib.

Onun fikrincə, bu, Ukraynanın şəhərləri, kəndləri və enerji infrastrukturunu Rusiyanın hücumlarından qorumaq üçün kritik əhəmiyyət daşıyır. O vurğulayıb ki, London öz tərəfdaşları ilə birlikdə sülhün təmin edilməsi üçün Ukrayna dəstəyini davam etdirəcək.

Almaniya isə Ukrayna Silahlı Qüvvələrinə iki ədəd "Patriot" hava hücumundan müdafiə sistemi və doqquzuncu "IRIS-T" kompleksini artıq təhvil verib.

Bundesver həmçinin Ukraynanın hava hücumundan müdafiəsini gücləndirmək üçün Almaniya arsenalından böyük miqdarda "AIM-9 Sidewinder" raketlərini Ukraynaya tədarük edəcək.

Almaniyanın müdafiə naziri Boris Pistorius qeyd edib ki, Berlin NATO-nun "PURL" mexanizmi vasitəsilə ABŞ arsenallarından kritik əhəmiyyətli silah və sursat alınması üçün Kiyevə əlavə 200 milyon dollar ayırıb.

Bu arada, Avropa İttifaqı Ukrayna üzrə Kompensasiya Komissiyasına 1 milyon avro məbləğində yardım ayıracaq. Avropa İttifaqının xarici işlər və təhlükəsizlik siyasəti üzrə ali nümayəndəsi, Avropa Komissiyasının vitse-prezidenti Kaya Kallasın sözlərinə görə, Rusiya dağıtdığı evlər, məktəblər və xəstəxanaların pulunu ödəmək məsuliyyətindən yayına bilməz.

"Haaqada Rusiyanın müharibədə Ukraynaya vurduğu ziyanla bağlı qaldırılan məsələlərin həlli üçün komissiya yaratdıq. Aİ bu komissiyanın işini dəstəkləyəcək və ilkin mərhələdə 1 milyon avro ianə ödəyəcək", – deyə K.Kallas əlavə edib.