Almaniyanın ordunu genişləndirməkdə məqsədi nədir?

Almaniya Silahlı Qüvvələrinin baş inspektoru Karsten Breuer ölkənin müdafiə qabiliyyətinin gücləndirilməsi məqsədilə 100 min əlavə ehtiyat əsgərə ehtiyac olduğunu açıqlayıb.

Onun sözlərinə görə, Almaniya NATO qarşısında götürdüyü öhdəliklər və Şərq cinahında artan təhlükəsizlik çağırışları fonunda 200 min aktiv əsgər olmaqla ümumilikdə 460 min nəfərlik hərbi potensiala ehtiyac duyur.

General qeyd edib ki, son illər ordu sıralarından tərxis olunmuş 800 min keçmiş əsgərdən 100 min nəfərin yenidən ehtiyat xidmətə cəlb olunması planlaşdırılır. Hazırda Bundesverin strukturunda 60 min nəfərlik daimi ehtiyat heyəti mövcuddur. Buna baxmayaraq, hələ də 100 min nəfərlik boşluq qalmaqdadır.

Xatırladaq ki, Almaniyada ümumi hərbi xidmət 2011-ci ildə ləğv edilib. Lakin son illərdə Avropada təhlükəsizliyi təhdid edən ciddi hərbi-siyasi dəyişikliklər fonunda bu məsələnin yenidən gündəmə gətirilməsi ölkə ictimaiyyətində geniş müzakirələrə səbəb olub.