Analoji zərbə onlara da vurulacaq | Əraqçıdan sərt mesaj

İran İsrailin hücumu zamanı cavab hədəflərini müəyyən edib. Bunu İranın xarici işlər naziri Abbas Ərağçi bildirib.

O qeyd edib ki, ölkəyə qarşı istənilən hücum qırmızı xətti keçmək kimi qiymətləndiriləcək. “İranın nüvə obyektlərinə hər hansı bir hücum lazımi cavabla qarşılanacaq. Rəsmi Tehran İsraildəki bütün hədəfləri müəyyənləşdirib və analoji zərbə onlara da vurulacaq”, – A.Ərağçi bildirib.

Nazir həmçinin qeyd edib ki, ABŞ-nin dəstəyi olmasa, İsrail Livan və Qəzza zolağında hərbi əməliyyatlar keçirə bilməz.

Qeyd edək ki, oktyabrın 1-də İran HƏMAS hərəkatı, “Hizbullah” təşkilatı və İran İslam İnqilabı Keşikçiləri Korpusunun rəhbərliyindəki şəxslərin öldürülməsinə cavab olaraq İsrail ərazisinə kütləvi raket zərbəsi endirib. Rəsmi Tehran bildirib ki, raketlərin 90%-i nəzərdə tutulan hədəfləri uğurla vurub, lakin İsrail iddia edir ki, İran 180-ə yaxın raket atıb və onların əksəriyyəti ələ keçirilib. Oktyabrın 15-də İsrailin müdafiə naziri Yoav Qalant xəbərdarlıq edib ki, ölkəsi raket hücumuna cavab olaraq İrana o qədər ölümcül və gözlənilməz zərbə vurmaq planlarından əl çəkməyib, iranlıların heç nə anlamağa vaxtları olmayacaq.