Ankara bu bölgəni istəyir, çünki... | ABŞ Fələstin dövlətinin yaradılmasına razı olacaq?

Türkiyə ABŞ və Rusiya prezidentləri Donald Trampla Vladimir Putin arasında baş tutan telefon danışığı fonunda Qəzza zolağı ilə bağlı öz iddiasını ortaya qoydu. Ankara vaxtilə Osmanlı imperiyasına daxil olan bölgəni istəyir.

Bunu erməni politoloq Akop Badalyan deyib.

Ekspert V.Putin və D.Trampın Qəzzaya baxışlarının maraqlı olduğunu bildirib: “Rusiyanın HƏMAS-la müəyyən əlaqələrinin və Yaxın Şərqdə təsir imkanlarının olduğunu nəzərə alan D.Tramp bu məsələdə V.Putindən dəstək gözləyəcəkmi?

Məlum olduğu kimi, Rusiya Fələstin-İsrail münaqişəsinin 2 dövlətli həll yolu əsasında həll edilməli olduğunu bildirir. İndi bunun əvəzi Qəzza ola bilərmi, yəni ABŞ Fələstin dövlətinin yaradılmasına razı olacaqmı?

Tramp-Putin söhbəti fonunda Türkiyənin bəyanatı da çox önəmlidir. Bu, rəsmi deyil, amma hesab edirəm ki, sabiq baş nazir Əhməd Davudoğlunun açıqlaması rəsmi Ankara ilə razılaşdırılıb.

Bəyanat Qəzzanın Türkiyəyə verilməsi ilə bağlıdır. Buna görə Qəzza məsələsində son həll əldə olunana qədər bölgə ən yaxşı variant kimi Türkiyənin nəzarətində ola bilər.

Üstəlik, Ə.Davudoğlunun Qəzzanın son beynəlxalq hüquqi mənsubiyyətinin Osmanlı imperiyası ilə bağlı olduğunu, bundan sonra bölgədə Britaniya mandatının olduğunu vurğulaması da maraqlıdır.

Görünür, Ankara Ə.Davudoğlu vasitəsilə bir yandan hissləri hərəkətə keçirməyə çalışır, digər yandan da ABŞ-Rusiya prosesi ilə Britaniyanın buna qarşı duyduğu ciddi qısqanclıq arasında sövdələşmə təklifi verir”.