Avropa liderlərinin aylardır hazırlaşdığı ssenari | Trampdan Brüsselə xəbərdarlıq

ABŞ Prezidenti Donald Trampın Avropa mallarına gömrük rüsumları tətbiq etmək planları ilə bağlı Brüssel və London aylardır müxtəlif ssenarilərə hazırlaşır.

Bu barədə “Politico” məsələ ilə bağlı məlumatlı mənbələrə istinadən xəbər verib.

Rəsmilər D.Trampı Avropa ixracatına rüsum tətbiq etməməyə inandırmağa ümid etdiklərini, lakin cavab rüsumları da daxil olmaqla bütün tədbirləri görməyə hazır olduqlarını bildiriblər.

Bundan əlavə, Böyük Britaniyanın Baş naziri Kir Starmer də daxil olmaqla Avropa liderləri tez bir zamanda Ukraynaya dəstək yükünü öz çiyinlərinə götürməyə və gələcək razılaşmalar üzrə D.Trampla danışıqlara hazır olduqlarını nümayiş etdirmək üçün planlar hazırlayırlar.

Bundan əvvəl D.Tramp Brüssel ABŞ-dən neft və qaz alışının həcmini artırmasa, Avropa İttifaqına daha yüksək idxal rüsumları tətbiq etmək niyyətində olduğunu açıqlamışdı:

“Mən Avropa İttifaqına dedim ki, o, ABŞ ilə olan böyük ticarət kəsirini bizim neft və qazımızın alışını əhəmiyyətli dərəcədə artırmaqla doldurmalıdır. Əks halda, o, tam qüvvədə tariflərlə üzləşəcək”.