Avropa və Yaxın Şərqdə baş verənlər bir-biri ilə əlaqəlidir | Andrey Sibiqa - Baku TV

Ukraynanın xarici işlər naziri Andrey Sibiqa Avropa və Yaxın Şərqdə baş verən hadisələrin bir-biri ilə sıx bağlı olduğunu bildirib.

O qeyd edib ki, Ukrayna və Fars körfəzi üzərində “Şahed” pilotsuz aparatlarının uğultusu eşidilir və İran rejiminə qarşı müharibə ilə Ukraynanın Rusiya təcavüzündən müdafiəsi eyni müharibənin iki cəbhəsidir.

O bu barədə “X” sosial şəbəkə hesabında yazıb.

Sibiqanın sözlərinə görə, Moskvadakı və Tehrandakı rejimlər bir-birindən ayrılmazdır: “Onlar birlikdə işləyir, resurs, silah və texnologiyalar mübadiləsi aparırlar. Bu rejimlər Ukrayna, Avropa, ABŞ və Fars körfəzi ölkələri üçün eyni təhlükəni yaradır. Buna görə də onlara qarşı effektiv müdafiə kollektiv olmalıdır”.

Nazir əlavə edib ki, Ukrayna bunu yaxşı anlayır: “Məhz buna görə biz təkcə öz ölkəmizdə deyil, həm də Yaxın Şərqdə insanların həyatını qorumaqla bağlı təcrübəmizi fəal şəkildə bölüşürük”.

Ukraynanın xarici işlər naziri ümumi təhdidlərə qarşı qəti addımlar atmağa çağırıb və İran, Rusiyanın müttəfiqlərinə qarşı təzyiqin zəiflədilməməsinin vacibliyini vurğulayıb.

O qeyd edib ki, Ukraynaya dəstək ümumi gücə çevrilən bir investisiyadır. “Moskvadakı və Tehrandakı rejimlərin ortaq xüsusiyyətlərindən biri odur ki, onlar yalnız güc dilini anlayırlar”, – deyə Sibiqa əlavə edib.