Avropada istilərlə əlaqədar həyacan siqnalı verilib
Avropa ölkələrində temperatur rekord həddə çatıb.
İspaniya, Fransa, Yunanıstan, Xorvatiya və Türkiyənin bəzi bölgələrində havanın temperaturu 40 dərəcəni keçib. İtaliyada Boloniya və Florensiya da daxil olmaqla 10 şəhər, eləcə də paytaxt Romada havanın temperaturunun 48,8 dərəcəyə yüksələcəyi bildirilir. Ölkədə qırmızı həyəcan siqnalı verilib. İtaliyanın şimalında Lodi şəhərində təsiredici istilər bir nəfərin ölümünə səbəb olub. Vəziyyəti pisləşən 44 yaşlı şəxsi xilas etmək mümkün olmayıb.
Böyük Britaniyanın Milli Meteoroloji Xidməti havanın temperaturunun iyulun 14 və 15-də pik həddə çatacağını açıqlayıb. Cənubi Avropanın böyük bir hissəsində də temperaturun 40 dərəcəni keçəcəyi bildirilib. 2022-ci ildə Avropada hökm sürən istilər səbəbindən 60 min ölüm halı olduğunu nəzərə alaraq, bu il rəqəmlərin daha da artacağı ilə bağlı narahatlıqlar var. Avropa Ortamüddətli Hava Proqnozları Mərkəzi iyunun dünyada ən isti ay olduğunu və temperatur rekordunun qırıldığını açıqlayıb.
Qeyd edək ki, Avropada indiyədək ölçülən ən yüksək temperatur 2021-ci ilin avqustunda İtaliyanın cənubundakı Siciliya adasında 48,8 dərəcə ilə qeydə alınıb.