Avropanın ikinci ən güclü hava donanması Türkiyəyə məxsusdur

"National Interest" nəşri Avropanın ən güclü hava qüvvələrinin reytinqini dərc edib.

Qiymətləndirmədə təyyarələrin sayı, döyüş hazırlığı, texnoloji infrastruktur və müdafiə sənayesinin imkanları nəzərə alınıb.

Reytinqdə birinci yerdə Rusiya qərarlaşıb. Hesabata görə, ölkənin təxminən 4300 təyyarədən ibarət hava donanması var və bunların 900-dən çoxu ön cəbhədə döyüş tapşırıqlarını icra edir.

Bildirilir ki, donanmanın əsasını "Su-30", "Su-35" və "Su-34" tipli 4 və 5-ci nəsil qırıcıları təşkil edir. Hesabata əsasən, Türkiyə təxminən 1000 təyyarə və 300-ə yaxın qırıcı ilə Avropanın ikinci ən güclü hava qüvvələrinə malik ölkə hesab olunub.

Qeyd olunur ki, Türkiyə Hərbi Hava Qüvvələrinin əsasını ABŞ istehsalı olan "F-16" qırıcıları təşkil edir. Məqalədə "Bayraktar TB2" pilotsuz uçuş aparatlarının həm 2020-ci ildə Ermənistan-Azərbaycan müharibəsində, həm də Rusiya-Ukrayna müharibəsinin ilk mərhələsində nümayiş etdirdiyi imkanların Türkiyənin hava döyüş texnologiyasındakı inkişafını göstərdiyi qeyd olunub.

Siyahıda üçüncü yerdə Böyük Britaniya, dördüncü pillədə Fransa qərarlaşıb. İlk beşliyi isə İtaliya tamamlayır.

Hesabatda vurğulanır ki, hava qüvvələrinin gücü yalnız təyyarələrin sayı ilə müəyyən edilmir. Pilot hazırlığı, texniki xidmət və döyüş hazırlığı səviyyəsi, erkən xəbərdarlıq sistemləri, texnoloji infrastruktur və müdafiə sənayesinin potensialı da əsas meyarlar sırasında yer alıb.