Avropanın "Ukrayna qətiyyətsizliyi" NATO-nu narahat edir

Ukrayna Prezidenti Volodimir Zelenski Fransanın paytaxtı Paris şəhərinə səfər edib.

Yelisey sarayında onun Avropa liderləri ilə görüşü keçirilib. Görüşdə Ukraynanın təhlükəsizliyinin sığortalanması müzakirə olunub.

Ukraynanın avropalı müttəfiqləri ABŞ Prezidenti Donald Trampla telefon danışığı üçün fasilə elan ediblər. Həmin fasilədə V.Zelenski Yelisey sarayını tərk edib.

Ukraynanın Prezident Ofisinin rəhbəri Andrey Yermak ilə ölkənin Milli Təhlükəsizlik və Müdafiə Şurasının katibi Rustem Umerov Parisdə Donald Trampın xüsusi nümayəndəsi Stiven Uitkofla da Ukraynanın təhlükəsizliyinə zəmanət barədə fikir mübadiləsi aparıblar. Müttəfiqlərin hava, su, quruda və kibertəhlükəsizlikdə daha fəal dəstək verməli olduqları vurğulanıb.

Xarici siyasi ekspertlərin fikrincə, hazırda Kremlin diqqəti Yelisey sarayındadır. Çünki Ukraynaya hərbi dəstəklə bağlı Parisdə mühüm qərarlar qəbul oluna bilər.

NATO-nun Baş katibi Mark Rutte isə Praqada çıxışı zamanı bildirib ki, xarici hərbi dəstələrin Ukraynada olub-olmamasına Rusiya qərar verə bilməz. Çünki Ukrayna suveren ölkədir və sülhə dəstəklə bağlı atacağı addımlara müdaxilə yolverilməzdir.

“Ukraynada hərbi kontingentin yerləşdirilməsi ilə bağlı Rusiyanın nə düşündüyü Avropanı niyə maraqlandırır?”, – deyə M.Rutte qeyd edib.