Ballistik raketlər işə salındı | Rusiya bu əraziləri nəzarətə götürdü

Rusiya-Ukrayna müharibəsi davam edir. Ukrayna Ordusunun Baş Qərargahından bildirilib ki, son sutka ərzində Rusiyanın daha 1140 hərbçisi məhv edilib.

Noyabrın 14-ü gecə saatlarında paytaxt Kiyev dron və ballistik raket hücumuna məruz qalıb. Bu barədə Kiyev Şəhər Hərbi Administrasiyasının rəhbəri Timur Tkaçenko məlumat verib. Bildirilib ki, bir neçə rayonda pilotsuz uçuş aparatları yaşayış evlərinə çırpılıb. Onlarla sakin xəsarət alıb, ölən var.

Kiyevin Obolon rayonunda yaşayış binasının 7-ci və 9-cu mərtəbələri yanıb. Bundan başqa, Svyatoşin rayonunda 5 mərtəbəli yaşayış binasında, Desnyan rayonunda da bir neçə ərazidə yanğın qeydə alınıb, Şevçenko rayonunda isə inzibati binanın yandığı bildirilib.

Ümumilikdə Kiyevdə təxminən 10 çoxmərtəbəli yaşayış binası zərər görüb. Xilasetmə əməliyyatları zamanı isə 40-dan çox insanın xilas edildiyi vurğulanıb.

Bununla yanaşı, son 24 saat ərzində Rusiya qoşunları Xarkov, Donetsk, Dnepropetrovsk, Zaporojye və Xersona hücum edib. Xarkov və Dnepropetrovsk vilayətlərində iki kənd nəzarətə götürülüb.

Rusiya Müdafiə Nazirliyinin məlumatına görə, gecə ərzində hava hücumundan müdafiə qüvvələri Ukraynanın 216 PUA-sını məhv edib.